هوس شعري اريد ان استوعبه ( وانتم معي ) في حضرة : المجنون ابو دفتر ! ،
واعني بذلك : سلطان مطلق الغنامي
فقط استمعوا !
.
.
,
حنّي علينا يا البلاد الحبيبه
................. يا ام الرخا والطيب والجود والخير
أغراب صرنا فيك وانتي غريبه
............... وش عذر الاغصان ان جفتها العصافير
عاشق ترابك منك يبغى نصيبه
................. كبير يحيا بك ولو حلمه صغير
مواطن :
متى نسكن !
أو إنه مايواطنا
وطنّا اللي موطنّا !
عشان الفرق ؟
طيب من على شانه!
صغير الجرح !
يبي يكبر
ويكبر ..لين مانقدر
نلم اللي تناثر من أمانينا
وانا داري !
..
وفي الشارع وجيه تمرّ
تشابه حزن هالحارة
وانا اتأمل وجيه الناس
يسلم نايف الاعرج
ويسألني عن البنك العقاري
وانا داري !
....
وفي فيّة جدار أم البنات الأرملة
نقعد .. ـ أنا واحمد
يقول:
ان المؤجر جا يطالبهم بمتأخر
وهم حق الاكل مافيش
تخيل مرمطة هالعيش !
وانا داري ..
....
على غفلة تجي نورة
تجرّ الصوت مذعورة
يا ناس اسعاف
سالم من شهر ما انشاف
عياله مالهم والي
وانا ضاقت بي احوالي
رهن عمره لذاك البنك
وذاق من العمار الظنك
من اللي ساجنٍ سالم
عليك الله ياظالم
وانا داري ..
..
ويتفلسف عليّ حسين
من اللي فاز بالمليون !
خليل الشبرمي قالوا
توقع وش يبي يبني ؟
اظنّ بينهبل يا ابني
واقول : الناس مايدرون
وانا داري ..
...
يكلمني على الهاتق :
عطا الله .. في البلد تسليف ؟
برمّم بيتنا وابني
لبوي ليا رجع ملحق
ولازادت معي حاجة
بجيب لسيف ثلاجة
وسيف يعوم باوجاعه
يبي يعرس بعد عامين
يمكن تسمح اوضاعه
يدّور بيت في الحارة
عشان امه .. وحارتنا
بنصف الخلق مزحومه
حراج وكثروا الباعه
وانا داري !
...
وتتجمع علي اطفال
شارعنا .. بنات عيال
شاعرنا يا ابو موال
وراك البارح تغني
(لديما) والوطن سارح !
سمعنا صوتك وقمنا
يا ابو دفتر ولا نمنا..
واقول : اللي يغني للوطن
دايم عصافيره ..
وانا عصفور واخذوني
بطير جناحي ...لساني
بلادي ياعصافير
وغصون وشمس مكسورة
من اللي يرسم الصورة !
سؤال ومن يبي يدري
يغنّي للوطن مثلي :
( ترى الدفتر وطن شاعر
ترى الشاعر وطن منفي
يا حلم يذوب في صدري
من اللي بالوطن شاعر! )
ومن داري ؟
---------------
>> hg,'k ]tjv
.. الوطن دفتر ..
