يا بو فهد . . ما هي بلحية بنـادول=إمل الوجار و شب ضو المعاميل
يا زين فنجال قهوة تو مزلول=في دلةٍ معها تزين التعاليل
كل الصداع اللي على راسك يزول=لا فاح منها ريحة البن و الهيل
دلة خبير . . بوسطها الكيف معمول=الشاذلية صبها بالفناجيل
يا بو فهد فكري له أيام مشغول=متشوقٍ للي يصوغ التماثيل
طيور فكري قامت ترف و تجول=و ما هي بعادتها تجيب المهازيل
الكحل ما يعرض مع بضاعة الحول=عشنا و شفنا يا زمان التهاويل
و من قال أنا اللي شاربي بس مفتول=شوارب طوال الشوارب مفاتيل
و اللي يدور له مع الحافي نعول=يبطي و هو حافي على مثل ما قيل
كلٍ ب هالدنيا له يدين و رجول=و ما كلها تاصل لنفس المواصيل
الطيب ما هو سلعة رخوم و خبول=الطيب سلعة للرجال المشاكيل
و الحر لامنك نخيته على طول=له هدةٍ تشف الصدور المغاليل
موت على عزة و لا عيش مذلول=إما القبر و لا رفيع المنازيل
الناس مخلوقة من قلوب و عقول=لكن لو تنطق يبين المهابيل
أحدٍ كلامه " سمنةٍ في صحن فول "=و أحدٍ كلامه كوكتيل الحناظيل
و أنا ليامن قلت أميز وش أقول=و إن قلت قولي تحتميه الأفاعيل
مير احمد اللي رزقنا منه مكفول=ما حط رزقي في يدين الرياجيل
, Hkh gdhlk rgj Hld. ,a Hr,g
و أنا ليامن قلت أميز وش أقول
