قصائد للشاعر عبدالله بن سعود بن زايد البيضاني، أحد شعراء قبيلة البيضان المعروفين في مجال النظم والمحاورة.
يا ناشد عن رحلتي يوم سافرت = اعطيك موجز والتفاصيل بعدين
يوم الربوع بيوم خمسة تشاورت = في شهر سبعة عام سته وعشرين
مع الرجال اللي لهم بالغلا صرت = أغلى من الأدنين وأعز الأدنين
قالوا مشينا قلت أنا ما تقهقرت = معكم على الشدة ومعكم على اللين
تخيروا يمة وأنا معهم اخترت = الرأي واحد دامنا مستعدين
قولوا وأنا معكم ترى ما تعذرت = قالوا نبا شرق الوطن قلت هالحين
اللي تبونه يا هل العرف حضرت = قالوا مشينا قلت ما أقول بعدين
كم طرقة عنها يالاصحاب خيرت = أدرى على السمعة وأجنب عن الشين
وانتم ليا سرتم على دربكم سرت = حيث انكم وافين من نسل وافين
ولو جار في الوقت ما قلت له جرت = ما دام عبدالله وبندر عضيدين
عبدالله اللي لا تضايقت سيرت = يمه وتقفي ضيقتي من وراء الصين
وبندر رفيقي يوم بالوصل قصرت = ياصل ولا والله تكفيه نعمين
الشمري له بالوفاء ما تنكرت =فيه الكرم والحلم والثالث الدين
وعن مالجا في داخل الصدر عبرت = وارج السموحة يالرجال العزيزين
قصيدة احتفال مكافحة الارهاب
بديت ذكر الله على الإنس والجان = ذكره على كل الثقلين بادي
الواحد الفرد الصمد عالي الشان = رب العباد اللي عليه اعتمادي
باسمه بديت وقمت يوم الوعد حان = في ماقفٍ مانيب عنه امتحادي
فالماقف اللي فيه للحق عنوان = ومن لا نطق في كلمة الحق غادي
هذا وانا بإسم المشدق والأعيان = قمت ونظمت من البيوت الجدادي
بمناسبة ما خصت فلان وفلان = مناسبة عمت جيمع البلادي
بأمرٍ من اللي قوموا كل الأركان = آل السعود منزحين الأعادي
حكامنا وأعلامنا طول الأزمان = أهل النقا وأهل التقى والرشادي
من فضلهم مافيه احد نام جيعان = والأمن والإيمان والخير سادي
يثني عليهم كل من عنده ايمان = ومن لاشكر مدت يدين العبادي
أقول في دينه وبالعقل نقصان = ومن قال عادي قلت ما هو بعادي
المسلمين اخوة كما رصف بنيان = بعقولهم وفعولهم والمبادي
واللي يبى تفريقنا اليوم غلطان = هذا حسب عرفي وهذا اعتقادي
والمملكة ماهيب للشر ميدان = محصنه وتقود، لا ما تقادي
من عصر أبو تركي ليا عصرنا الآن = وأخوان نوره محتمين الشدادي
واللي يبا يطمع يبا يعود خسران = ويموت والله ما ينال المرادي
أقولها للناس راضي وزعلان = ما للقيادة غير رجلٍ قيادي
ياللي تحرض لك شبابٍ وشيبان = على الفتن وتقول هذا جهادي
أشهد شهادة حق منته بربحان = خسران في الدنيا ويوم التنادي
حللت دم اللي على الأمن سهران = تفتي ودمك مثل دم القرادي
وعلمٍ تجيبه علم زورٍ وبهتان = وبنيٍ بنيته مقتفيه الهدادي
والبيت ما يصلح على غير سيسان = عندك خبر لكن قلبك جمادي
يا زارع الفتنة ترى الناس صقهان = لو أن صوتك طال عبر الروادي
ما يتبعك رجلٍ معه فكر واعيان = ولا يتبعك رجل تبع خير هادي
والحق مثل النور والنور لا بان = مثل شعاع الشمس يجلى السوادي
وانتم تشوفون المشاكل بالاوطان = منها يشيب اللي بضف المهادي
كم من غنيٍ يصبح الصبح فقران = ما بين سلب ونهب عيشه نكادي
من سبة الفتنة فنى شعب الافغان = وأرض العراق اليوم راحت رمادي
وشعبه من الخيرات والعز عريان = شيءٍ يشوفه شوف ما هو دوادي
أحدٍ بسجن غريب حيٍ ومنهان = وأحدٍ طليق وكن فيه القيادي
وأطفالهم من سبة الشر يتمان = مصايبٍ ما بين صبح وهجادي
تعبروا ثم اسجدوا سر واعلان = ومن يشكر النعمة بنعمه يزادي
وحنا بخير ونعمةٍ تبغى الاحسان = وشكر الإله اللي على الخلق جادي
وش خانة الدولة ليا ضاع الآمان = وقامت تعرضها قصار الأيادي
وكلٍ طمع بالحكم لو كان سكران = والحكم ما يصلح لخبلٍ ربادي
يصلح لخو نورة سلايل كحيلان = الحاكم اللي فادنا واستفادي
الله يطول عمره أزمان وأزمان = يسهر وحنا نهتني بالرقادي
ومعه الثنين اللي عل ىالحق عوان = عبدالله اللي بالمواقف سدادي
وسلطان ابو خالد ملاذٍ ومزبان = وقدره وتقديره مع الناس زادي
ومحبة آل سعود تبقى وتنصان = وتقديرهم في قلوبنا لا إرادي
ولغيرها فالقلب ما فيه مسكان = نحيا ونموت وحبهم بالفؤادي.
واستريح من العنا:
تعبت يانايف وطولت ساقتي = واشتلت حملٍ زايدٍ عن طاقتي
واليوم ابا أجلس في مباريك ناقتي = مثل العتيبي واستريح من العنى
الناس لو جاملتهم ما تجملوا = وان جيتهم في لازمٍ لك تسللوا
والحر يعرف ما تغير مواقعه = والمستحيله صارت اليوم واقعه
والمزن من منشاه كثرت صواقعه = وراعي الزراعة من زروعه وش جنى
لا جف بيره واقتفته العاصفة = وطارت زروعه ما بقى ما ياصفه
وليا شكى للناس ما أحدٍ ناصفه = وإلى نشدته قال أنا يومي دنا
قلت البنادم ما له إلا ماكتب = يخبرك فيها اللي قرا واللي كتب
والعلم ماهو بس في وسط الكتب = ومن لا تعنى ما يحسب للعنى
وأعرف ترى الأيام مثل المدرسة = العلم ماهو بس حرفٍ تدرسه
الله من حرفٍ يمر وما أدرسه = وفي كل حال الشكر لله والثنى
اللي خلق خلقه وعنده عدها = واللي يريد يعدها ما عدها
الظامية يطري عليها عدها = أمثال معروفة وقايلها فنا
والطيبة تبقى ويبقى ذكرها = لو مات راعيها رفيع وكرها
واللي يبى النعمة يبين شكرها = ويقضي حياته بالسعادة والهنى
هذا كلامي والعرب بأفكارها = وأهل الوفى والطيب نعرف كارها
لو هي بعيدة نفتخر بأذكارها = وهذي سلوم الناس ما هو بس أنا
ولا كل رجال يزل نواخذه = لو كان عشنا بالحياة نواخذه
وقسمن ماهو قسمٍ لنا ما ناخذه = وأقسامنا لازم تجينا بلا عنا
تم الكلام وكلمتي في حلها = شفت الحبال معقده وأحلها
واللي علي محرمه ما أحلها = النفس قنعانة ومن يقنع غنا
واعداد ما هل الخيال وما نشى = صلوا على اللي ما تغير من نشا
واللي يشا ربي وحنا ما نشا = وفي في كل حال الشكر لله والثنى
قصيدة مهداه للأخ بندر بن مناحي العتيبي :
يا بو سعود الله يخلي لك سعود = ويقومه بالعافية والسلامة
قدرك كبير وعندنا ماله حدود = ويبقى رفيع إلى نهار القيامة
ياراعي الفزعة وياراعي الجود = شرواك واجب للجميع احترامه
أقولها وأنا على قولي شهود = ما ني بمن يملح ويجرح كلامه
فعل الوفاء بين الرياجيل مردود = ولا يجحده غير الغشيم الهلامة
وحبل الرجاء بالله ثم فيك معقود = لا عض أخوك من الثقايل ابهامه
أظن فيك وكل ما أظن موجود = بالطيب وأنت الطيب تلبس وسامه
وصلاة ربي عد ما هبت النود = على شفيع الخلق يوم القيامة
قصيدة في جاهية:
الحمدلله خالق الإنس والجان = اللي بتدبيره تصير المقادير
عقب الليال اللي بها الطرف سهران = جاني بشير الخير معه التباشير
قال أبشر إن الصعب بأمر الولي هان = ولا عسرٍ إلا تقتفيه التياسير
قلت العلوم بساع كان أنت عجلان = عطني جميع أخبارهم والتقارير
قال المريض بخير طيب وفسقان = قلت الله انه يجعله دوم في خير
ويبقيه للي يرتجي منه الإحسان = ويا قاه ربي من جميع العواثير
حقه علي أدعي له بكل الأزمان = ولكل مسلم حق ولحقه أغير
المسلمين اخوة وحنا له اخوان = والكامل اللي سير الفلك تسيير
والمشكل اللي صار ما هو بحسبان = لكن أخو مرة يدق المزامير
ويجري مجاري الدم بعروف الإنسان = والعاقل اللي ينتبه قبل ما يغير
وعن السجين ومن معه قال سلطان = فكوهم اللي ينطحون الطوابير
شوخٍ لهم في قمة المجد مسكان = لو أن حملك كبر ابانات والنير
لياجيتهم قالوا فزعنا لك الآن = ما منهم اللي قال أرد التفاكير
ميقافهم يجلا عن الكبد الأغبان = زحول الرجال مكرمين الخطاطير
ستر العذارى مشبعة كل جيعان = أفعالهم ما تنحصي بالتعابير
منهم رباح الصيرمي طلق الأيمان = مقدم هل العرفاء زبون المخاسير
ليا قام لو حملك كبر ضلع ورقان = عنده حرام انه ثقل ريشة الطير
ركن القبيلة عند روغات الأذهان = ما ضاق صدره لو تطول المشاوير
وبالمدح لو دونت يا شيخ ديوان = أبقى مقصر وأنت منك المعاذير
وابن نجا له قومةٍ شانها شان = وله ماكرٍ بين الحرار النوادير
ليا كبرت القالات ما هو بلشان = عند القبيلة له معزة وتقدير
نايف براس النايفة طير حوران = يارد ويورد من ظما جمة البير
وبندر فعوله ما تقدر بالأثمان = ترفع له البيضا عشير المناعير
مدحه وجب وأقول ماني بغلطان = إليا مدحت مصخر الصعب تصخير
فعله عليه شهود ما هوب بهتنان = يوصف على حاتم ويوصف على الزير
اللي جعل بيته لمن جاه مزبان = لعلها قدام وجهه مسافير
ولعل ما تبكيك ياشيخ الأعيان = يا ملتجا من شاف بالجو تعكير
ولا هان صالح طيب العرف لا هان = ابو محمد راعي الجود والخير
عند اللزوم يقوم ماهو بعجزان = ولوقفته عند العرب كل تأثير
أبو محمد كل ما كاد له هان = شيخٍ حكيم ومن رجالٍ مشاهير
وذعار أبو نواف للمجد عنوان = إلى نخيته قام مافيه تأخير
عقب الرجال اللي على الخيل فرسان = بإيمانهم يروون حد البواتير
تم الكلام اللي من القلب ولسان = واجب عليه يوم جيتوا مسايير
لو كان ما أنتم ياهل العرف ضيفان = أنتم من أهل الدار ما أقول تزوير
لكن ترى الإحسان يجزى بالإحسان = طبع العرب ما فيه شكٍ وتغيير
وراجي السموحة كان بالقول نقصان = المجتهد يعذر ليا حصل تقصير
وختامها صلوا عدد وبل الأمزان = وعد النجوم وعد نبت النواوير
على النبي الهاشمي نسل عدنان = محمد اللي طهر الدين تطهير
قصيده مهداه للشاعر سيف بن سعيد القحطاني :
يالله إنك لا تهين الشعر واللي ينظمونه = الشواعير الكرام اللي يحلون القضايا
القصيد الى بدوا به بالجمال يطرزونه = لين يصبح مثل عقد الماس بأرقاب الصبايا
ولين يصبح راجحٍ بالوزن للي يازنونه = كامل لا سمعه العاقل يرد إله التحايا
وحي شعرٍ يطرب اللي بالمسامع يسمعونه = كن وقعه وقع سيفٍ مع مقاديم السرايا
ولو يموت اللي يقوله، ما يموت ويحفظونه = الكلام الزين يبقى فالقلوب وفالخلايا
مثل شعر الشاعر اللي كل ربعه يشكرونه = شاعر يوم الدهايا وقفت قدم الدهايا
وكل واحد صوب الآخر قام ينظر في عيونه = سار قدم الجمع كله ثم برك مثل المطايا
ثم بدع قاف قليل اللي سواته يبدعونه = بالنيابه عن بني قحطان زاكين السجايا
ثم نهض بالحمل من طيبه ولا مالت متونه = حي راس اللي يسوي بالمواقف هالسوايا
أمدحه لو ما أعرفه وأهل المعرفة يمدحونه = سيف من قحطان وهوه سيف لا جات الحمايا
أعتق القاتل وقبل ما لقى من يعتقونه = أشهد أنه سيف قول وفعل ما فيها حكايا
ذا كلام الشاعر الحربي بعد هاضت شجونه = من سبب فعلٍ على وضح النقا ما هو خفايا
والختام عداد برقٍ لاح في مقدم مزونه = يا صلاة الله وتسليمي على سيد البرايا
قصيدة موجهه للشاعر فهد بن عبدالهادي بن هديرس:
يا فهد من ضيقت الصدر شديت الحزام = يوم شفت الشيخ عنها تراخى محزمه
قبلها صايم وغيري رياجيلٍ صيام = واللذي صايم عن الزاد، ما أحدٍ يعزمه
مير دار الوقت والنور جلاي الظلام= والشجيع إلى خذ السيف ما أحدٍ يهزمه
وان وقف في ماقفه ما تلحقه الملام = ما تلومه كان خشم العادي يخزمه
وأنت عرفي فيك تعرف تفاسير الحلام = جاك خطي من يميني وباليمنى الزمه
رد فهد:
ياهجوسي اسعفيني بسرعة والهمام = لا هي بعادي الدعاوي ولا متأزمه
كل رجلٍ له طبيعة ومقدار ومقام = والعوى للذيب وإلا الجمل إله ارزمه
حي منهو لا بغى القسم يطمع بالسنام = وحي منهو لا غزى القوم قلبه ما أجزمه!!
وأنت يا بو سعود مسلم ولا فيها كلام = تطلب المولى ما بين الحطيم وزمزمه
والسوالف جات يا صاحبي حسب النظام = كنها بالوصف وصف المزون المرزمه
لا يضيق الصدر منها وهي برد وسلام = وكل رجل عيال عمه ذراه ومحزمه
السلوم تقول للضيف واجب واحترام = والمعزب واجب الضيف دايم يلزمه
والعرب لوهي تحزب يجي فيها انقسام = ما نطيع بليس وبليس دايم نكزمه
والمجامل بعض الاحيان شبه الانهزام = والركايب في ظهرها الحمول امحزمه
والضعيف صار راسه بعد دارت عدام = بين جور المطرقة وبين شد الملزمة
حسب عرفي والشجيع ان وقف يلبس وسام = ما برد عزمه ولا احتاج منهو يعزمه
وهذه القصيدة مجاراة لإحدى قصائد فهد بن عبدالهادي والتي نشرت في جريدة الجزيرة:
لو زاد حملك يا فهد لا تشره = ترى القناعة كنز وانته قنوعي
الكون هو الكون بحره وبره = ما به غياره بالشهر والسبوعي
لا تشتكي من برد وقتك وحره = ودنياك هذي كلبوها متوعي
ولا كل من غاص البحر جاب دره = قبلي وقبلك لا بسين الدروعي
ما منهم اللي شاف منها المسرة = افعالها يا ين هديرس تروعي
ما تنطحك بالوجه تا تيك غره = افنت لها اجيالٍ ترد الجموعي
راحوا ولا باقي لهم غير جرة = وصار الخلف فيه اختلاف الطبوعي
اغوتهم الدنيا مع اوخي مرة = وشفت التغير يا فهد بالفروعي
واللي سواتك قلت لله دره = فكري معه واسغي لهرجه اسموعي
يالله لعل ابوك طوبى مقره = سبعٍ رحل وأرث مكانه اسبوعي
ولو زاد حملك يا فهد لا تشره = انته بتوع ومعك سيفٍ بتوعي
قصيدة اخرى:
هات القلم واكتب كلامٍ موجز = وخير الكلام اليا توجز وجازي
مني لبن عمي كتاب مجهز = ابن الرجال الطيبين العزازي
اشكي عليه اللي علينا تجاوز = ناس بهم يا حمود كل المخازي
ناس صورهم بالمجالس تبروز = ولا فيهم اللي للمواجيب حازي
عجزت أعالج جربهم والمنحز = وراع الجرب يضحك براع النحازي
كلٍ بفعله يا ابن عمي محجز = ما ني بغزايٍ بليا مغازي
وإن قلت بعض الناس ما عاد به عز = ما ني محاسب للجزاء والمجازي
قلبي ما هو غصنٍ مع الريح يهتز = في حال وإلا حال فيه اهتزازي
واليوم يوم ان الزمن لزني لز = ومن لزته شفني وحيدٍ حيازي
وكن الرماح بثومة القلب تركز = وكن القدم ياحمود تا طا قزازي
واليوم ابا شورك عليه اتعنز = ومن شاور العراف يا حمود فازي
انا ابتعد عن دارهم واتبرز = وإلا نزيد النار يا حمود قازي
وختامها عطني كلامٍ موجز = وخير الكلام ليا توجز وجازي
واسلم سلمت ودمت وانته على عز = يا بن الرجال الطيبين العزازي
قصيدة موجهه للشاعر حسن بن صنت البدارني :
يا بوصنت قلبي تجدد صوابه = واصبحت مثل اللي كفيف ومشلول
ماله جدى إلا عض كفه بنابه = بس يتحرى اللي على الروح مرسول
ضاقت به الدنيا وشقق ثيابه = ومن شاف حاله قال لا حول لا حول
حالي وحاله يا بابن عمي تشابه = ويمكن تكذبني ليا قلت مدبول
لكن ابا اشرح لك وابا منه جابه = ابا جوابٍ منك ما هو بمعسول
ابا جوابٍ فيه للحال ثابه = وانته كلامك يا فتى الجود مقبول
ابا استشيرك يا حفيد الذيابه = باللي لغاهم تالي الوقت مجهول
وابا استشيرك يا حفيد الذيابة = باللي معه سيفٍ بيمناه مسلول
لكن صارت ضربته في زهابه = اخطا الهدف واقول ماهو بمعقول
واليوم عن داره تقافت ركابه = ومن شاف زوله قال مخيول مخيول
وأبا انشدك عن بنت راحت نهابه = بنتٍ لها في ماضي ايامنا فحول
واليوم تجلب قدم عيني جلابه = راحت وحنا نضرب العرض بالطول
وانشدك عن شيخٍ عزيزٍ جنابه = شيخٍ وداره للاجاويد مدهول
لكن تال الوقت مصكوك بابه = وعشقه تبدل في مزامير وطبول
وانشدك عن عودٍ كثيرٍ خرابه = من عصر ابونا آدم ومن عصر ابو الهول
تعوذوا منه السلف والصحابة = واللي يجبه يا ابن الاجواد مخذول
وهذا الذي سبب لقلبي عذابه = لكن عسى عندك لما قلته حلول
الصبر زاد الحال هم وكآبه = ولا كل من يصبر لمطلوبه ينول
واعداد ما هل المطر من سحابه = صلوا على اللي للثقلين مرسول.
]d,hk uf]hggi fk su,] .hd]
ديوان عبدالله بن سعود بن زايد
